پنجاب میں نجی اسکولوں میں لازمی قرآن تعلیم نافذ کرنے کا مطالبہ

پنجاب میں نجی اسکولوں میں لازمی قرآن تعلیم فوری نافذ کرنے کا مطالبہ

پنجاب بھر کے نجی اسکولوں میں لازمی قرآن تعلیم کے نصاب کو فوری طور پر نافذ کرنے کے لیے پنجاب اسکول ایجوکیشن ڈیپارٹمنٹ کو باضابطہ درخواست جمع کرا دی گئی ہے۔

یہ درخواست سیکریٹری اسکولز کو سید احسن محمود کی جانب سے دی گئی، جو پنجاب قرآن بورڈ کے رکن اور انجمن ناشرانِ قرآن کے صدر ہیں۔

درخواست کے مطابق پنجاب وہ پہلا صوبہ تھا جہاں قرآن کی تعلیم کو لازمی مضمون قرار دیا گیا۔ قانون کے تحت جماعت اول تا پنجم کے طلبہ کو ناظرہ قرآن پڑھانا ضروری ہے، جبکہ جماعت ششم تا دوازدہم کے طلبہ کے لیے ترجمے کے ساتھ قرآن کی تعلیم لازمی قرار دی گئی ہے۔

درخواست گزار نے مؤقف اختیار کیا کہ سرکاری اسکولوں میں اس قانون پر عمل کیا جا رہا ہے، لیکن کئی نجی اسکولوں میں ناظرہ قرآن نہیں پڑھایا جا رہا، جبکہ جماعت ششم تا ہشتم میں ترجمۂ قرآن کی تعلیم کے مناسب انتظامات بھی موجود نہیں ہیں۔

سید احسن محمود نے محکمہ تعلیم سے مطالبہ کیا کہ تمام نجی اسکولوں میں لازمی قرآن مضمون کو فوری طور پر نافذ کیا جائے تاکہ تمام طلبہ کو یکساں دینی تعلیم فراہم ہو سکے۔

محکمہ اسکول ایجوکیشن کے حکام نے اس معاملے کو اہم قرار دیتے ہوئے یقین دہانی کرائی ہے کہ اس حوالے سے جلد مؤثر اقدامات کیے جائیں گے۔